20 апрель куни Сан-Себастьян кўчаларига қарийб 100 минг киши йиғилиб, Испания Кубогидаги ғалабадан сўнг «Реал Сосьедад» жамоасини тантанали равишда кутиб олди. Бу ҳақда Mundo Deportivo нашри хабар бермоқда.

Байрам тадбирлари шаҳар марказидаги ратуша биноси олдида бошланди, сўнгра очиқ автобус кубокни «Аноэта» стадионига қадар олиб борди.

Тантананинг энг ёрқин лаҳзаларидан бири жамоа бош мураббийи Пеллегрино Матарраццонинг завқланган оломон олдида баск тилида нутқ сўзлаши бўлди.

Байрам тадбирига Микель Ойярсабаль ва ҳимоячи Ариц Элустондо бошчилик қилишди. Бу икки фахрий футболчи 2021 йилда ҳам Кубокни қўлга киритишган, бироқ ўшанда пандемия сабабли ғалабани мухлислар билан бирга нишонлаш имконига эга бўлишмаган эди.

Элустондо мухлисларга қарата, Ойярсабаль «Реал Сосьедад»да содир бўлаётган барча эзгу ишлар учун энг катта масъул шахс эканини айтди. Капитан ҳам унга муносиб жавоб қайтарди. «У ҳатто майдонга тушмайдиган кунларида ҳам худди асосий таркибда тушгандек табассум билан келади, бу эса кийиниш хонасида жуда муҳим», — деди Ойярсабаль. Бу сўзлардан Элустондонинг кўзларига ёш келди.

Ратуша олдида 40 минг киши тўпланган бўлса, яна 60 минг киши автобус ҳаракатланган йўналиш бўйлаб саф тортди. Маълумот учун, шаҳар аҳолиси 190 минг кишини, бутун Гипускоа минтақаси аҳолиси эса 700 минг кишини ташкил қилади.

Эслатиб ўтамиз, Испания Кубоги финалида «Реал Сосьедад» «Атлетико Мадрид»ни мағлуб этган эди (асосий вақт 2:2, пенальтилар бўйича 4:3).