Madridning «Real» klubi sobiq yarim himoyachisi Toni Kroos sobiq jamoasidagi joriy holat va Kilian Mbappe borasidagi savollarga keskin tarzda javob berishdan bosh tortdi. Bu haqda Madrid Xtra nashri xabar bermoqda.

Suhbat davomida jurnalist germaniyalik sobiq futbolchining «qirollik klubi» va Mbappe haqidagi fikri bilan qiziqqan, biroq Kroos mavzuni o‘zgartirishni talab qilgan.

«Eshiting, biz suhbatni hoziroq tugatishimiz mumkin. Men endi «Real» haqidagi savollarga javob bermayman. Agar ish yuzasidan savolingiz bo‘lsa — bering. Agar yo‘q bo‘lsa, shu joyda to‘xtashimiz mumkin», — dedi Kroos.

OAV vakili «Madridda odamlar hali ham siz haqingizda gapirayotgani siz uchun nimani anglatadi?» deb qayta urinib ko‘rgan. Kroos esa bunga javoban: «Do‘stim, bu «Real» haqidagi savol-ku. Meni eshitmadingizmi?» deya munosabat bildirgan.

Jurnalist o‘z savolini «Bu yerda gap umuman futbol haqida ketmoqda, «Real» haqida emas», deb xaspo‘shlashga uringanida, Kroos suhbatni qisqa qildi: «Bu savolni berish orqali siz «Real»dagi vaziyatni nazarda tutayapsiz. Men ahmoq emasman».

Eslatib o‘tamiz, seshanba kuni «qaymoqranglilar» o‘z maydonida «Alaves» ustidan 2:1 hisobida g‘alaba qozonishdi. Toni Kroos esa o‘tgan mavsum yakunida professional futbolchilik faoliyatini yakunlagan edi.