«Barselona» sobiq bosh murabbiyi Xavi Ernandes vinger Rafinya Diasning transferi qanday amalga oshgani haqida so‘zlab berdi.

«Ko‘k-anorranglilar» braziliyalik futbolchining «Lids»dan sotib olinganini 2022 yilning yozida e’lon qilishgan edi. Ushbu kelishuv o‘zini oqladi: Rafinya darrov ochilib ketmagan bo‘lsa-da, yakunda Kataloniya grandining asosiy o‘yinchisiga aylandi.

«Rafinyaning transferiga aynan men qattiq turganman. Klubga uni sotib olish bo‘yicha ko‘rsatmani men bergandim. Men uni hali «Ac-Sadd»da ishlab yurgan vaqtlarimda, u Portugaliyada o‘ynayotganidayoq o‘z jamoamda ko‘rishni istagandim. «Barselona»da Mateu Alemani va Yordi Kroyfga bu o‘yinchini albatta qo‘lga kiritishimiz shartligini aytganman. U gollar uradi, yakkama-yakka kurashlarda kuchli va bo‘sh hududlarga hujum qila oladi. Men doimo unga bo‘lgan ishonchni mustahkamlashga harakat qilganman», — deya Xavining so‘zlarini keltiradi Barca Universal.

Rafinya «Barselona» safida barcha musobaqalarda jami 175 ta o‘yinda maydonga tushib, 73 ta gol va 59 ta golli uzatmani amalga oshirdi.