«Барселона» собиқ бош мураббийи Хави Эрнандес вингер Рафинья Диаснинг трансфери қандай амалга ошгани ҳақида сўзлаб берди.

«Кўк-анорранглилар» бразилиялик футболчининг «Лидс»дан сотиб олинганини 2022 йилнинг ёзида эълон қилишган эди. Ушбу келишув ўзини оқлади: Рафинья дарров очилиб кетмаган бўлса-да, якунда Каталония грандининг асосий ўйинчисига айланди.

«Рафиньянинг трансферига айнан мен қаттиқ турганман. Клубга уни сотиб олиш бўйича кўрсатмани мен бергандим. Мен уни ҳали «Аc-Садд»да ишлаб юрган вақтларимда, у Португалияда ўйнаётганидаёқ ўз жамоамда кўришни истагандим. «Барселона»да Матеу Алемани ва Йорди Кройфга бу ўйинчини албатта қўлга киритишимиз шартлигини айтганман. У голлар уради, яккама-якка курашларда кучли ва бўш ҳудудларга ҳужум қила олади. Мен доимо унга бўлган ишончни мустаҳкамлашга ҳаракат қилганман», — дея Хавининг сўзларини келтиради Barca Universal.

Рафинья «Барселона» сафида барча мусобақаларда жами 175 та ўйинда майдонга тушиб, 73 та гол ва 59 та голли узатмани амалга оширди.