«Liverpul» bosh murabbiyi Arne Slot hujumchi Muhammad Salohning jarohati borasida to‘xtalib o‘tdi. Eslatib o‘tamiz, forvard APL 34-turi doirasidagi «Kristal Pelas»ga qarshi o‘yinda (3:1) shikastlangan edi.

«Yana bir g‘alaba va yana bir jarohat — bu butun mavsumimiz davomida kuzatilayotgan holat. Hozircha aniq bir gap aytish juda erta, biroq barchamiz Salohni yaxshi bilamiz va uning uchun maydonni tark etish naqadar qiyinligidan xabardormiz. Agar Saloh o‘yinni to‘xtatgan bo‘lsa, demak bu ko‘p narsadan dalolat beradi. Shunga qaramay, jarohat qanchalik jiddiy ekanini bilish uchun biroz kutishimiz kerak», — deya Slotning so‘zlarini keltiradi insayder Fabrisio Romano.

Joriy mavsumda Muhammad Saloh «Liverpul» safida barcha turnirlarda 39 ta o‘yinda maydonga tushib, 12 ta gol urdi va 9 ta golli uzatmani amalga oshirdi.