Madridning «Real» klubi bosh murabbiyi Alvaro Arbeloa jamoa ichidagi jiddiy muammoga duch keldi. The Athletic nashrining xabar berishicha, murabbiy va jamoaning asosini tashkil etuvchi ispaniyalik futbolchilar o‘rtasida tushunmovchiliklar paydo bo‘lgan.

Manbaning ta’kidlashicha, Arbeloa hatto jamoa sardori Dani Karvaxal bilan ham kelisha olmay qolgan. Bundan avvalroq esa murabbiy yarim himoyachi Dani Sebalyos bilan yuzaga kelgan nizodan so‘ng uni qaydnomadan chiqarib tashlagani haqida xabarlar tarqalgan edi.

Ichki muhitdagi notinchlik jamoaning natijalariga ham ta’sir o‘tkazmay qolmayapti. O‘tgan haftada «Real» safarda «Betis» bilan durang (1:1) o‘ynadi va natijada peshqadam «Barselona» bilan farq 11 ochkogacha kengaydi. Madridliklar navbatdagi uchrashuvni 3 may kuni «Espanyol»ga qarshi o‘tkazadi.