«PSJ» o‘z maydonida Chempionlar Ligasi yarim finalining dastlabki uchrashuvida «Bavariya»ni 5:4 hisobida mag‘lub etdi. Parijliklar birinchi bo‘lib gol o‘tkazib yuborishgan bo‘lsa-da, 58-daqiqaga kelib ustunlikni 5:2 ko‘rinishiga keltirishdi. Myunxenliklar esa bunga yana ikkita gol bilan javob qaytara olishdi. Jamoalar Chempionlar Ligasi yarim finallari tarixidagi sermahsullik rekordini yangilashdi.
«Men hatto bir kilometr ham yugurmagan bo‘lsam-da, juda charchab ketdim. Endi futbolchilarning hozirgi holatini tasavvur qilavering... Nima bo‘lganda ham, har ikkala jamoani ajoyib o‘yin bilan tabriklashimiz kerak», — dedi «Pari Sen-Jermen» bosh murabbiyi Luis Enrike o‘yindan keyingi matbuot anjumanida.
Kelasi chorshanba kuni «PSJ» va «Bavariya» «Alyans Arena»da Chempionlar Ligasi final yo‘llanmasi taqdirini hal qilishadi.
