«ПСЖ» ўз майдонида Чемпионлар Лигаси ярим финалининг дастлабки учрашувида «Бавария»ни 5:4 ҳисобида мағлуб этди. Парижликлар биринчи бўлиб гол ўтказиб юборишган бўлса-да, 58-дақиқага келиб устунликни 5:2 кўринишига келтиришди. Мюнхенликлар эса бунга яна иккита гол билан жавоб қайтара олишди. Жамоалар Чемпионлар Лигаси ярим финаллари тарихидаги сермаҳсуллик рекордини янгилашди.
«Мен ҳатто бир километр ҳам югурмаган бўлсам-да, жуда чарчаб кетдим. Энди футболчиларнинг ҳозирги ҳолатини тасаввур қилаверинг... Нима бўлганда ҳам, ҳар иккала жамоани ажойиб ўйин билан табриклашимиз керак», — деди «Пари Сен-Жермен» бош мураббийи Луис Энрике ўйиндан кейинги матбуот анжуманида.
Келаси чоршанба куни «ПСЖ» ва «Бавария» «Альянц Арена»да Чемпионлар Лигаси финал йўлланмаси тақдирини ҳал қилишади.
