«Liverpul» hujumchisi Saloh sobiq bosh murabbiy Yurgen Klopp qanday qilib «qizillar»dan barcha turnirlarda g‘oliblikka da’vogarlik qiladigan jamoa shakllantira olgani haqida gapirib berdi.
«Menimcha, u futbolchilarni boshqarishni bilardi, vaholanki bu juda qiyin ish. Tajriba orttirganing sari futbolchini boshqarish naqadar murakkab ekanini tushunib borasan. Kiyinish xonasida ham shunday — bizdagi kabi yulduzlar jamoasini birdek motivasiyada ushlab turish oson emas. Nazarimda, uning baxti kulgan edi, chunki hammamiz ishlashni, g‘alaba qozonishni xohlardik va u bizni majburlashiga hojat qolmasdi. Har birimiz buyuk natijalarga erishishni istardik. Bundan tashqari, futbolchilar o‘rtasida ajoyib aloqa bor edi», — dedi Saloh TNT Sports Football nashriga bergan intervyusida.
Yurgen Klopp boshchiligida «Liverpul» Angliya liga kubogi (ikki marta), Angliya superkubogi, mamlakat kubogi, APL, Chempionlar ligasi, UYEFA superkubogi va klublar o‘rtasidagi jahon chempionatida g‘olib chiqqan.
