«Bavariya» boshqaruv kengashi a’zosi Uli Xyoness himoyachi Konrad Laymer bilan shartnomani uzaytirish imkoniyatlari haqida o‘z fikrini bildirdi. Avvalroq Germaniya grandi futbolchining yuqori moliyaviy talablarini qondirishga tayyor emasligi haqida xabar berilgan edi.

«Konni — men juda yuqori baholaydigan o‘yinchi, lekin u Maradona ham, Keyn ham emas. U kabi futbolchilar, hatto juda yaxshi maosh olayotgan bo‘lsalar ham, ma’lum chegaralar borligini tan olishlari kerak», — dedi Xyoness DAZN nashriga bergan intervyusida.

Laymer 2023 yildan beri «Bavariya» sharafini himoya qilib kelmoqda. Ushbu mavsumda 28 yoshli avstriyalik futbolchi barcha musobaqalarda 43 ta o‘yinda maydonga tushib, 3 ta gol urdi va 12 ta golli uzatmani amalga oshirdi.

Laymerning «Bavariya» bilan amaldagi shartnomasi 2027 yilning yozida nihoyasiga yetadi. Transfermarkt portali futbolchini 32 million yevroga baholagan. Eslatib o‘tamiz, «Bavariya» navbatdagi uchrashuvini 9 may kuni «Volfsburg»ga qarshi o‘tkazadi.