Kilian Mbappening jarohatidan tiklanish jarayoni haqida yangi tafsilotlar ma’lum bo‘ldi.

Avvalroq, «Real» hujumchisi dam olish kunlarida fizioterapevtlar va reabilitasiya mutaxassislari bilan faol ishlagani xabar qilingan edi. Fransuz futbolchisining rejasi — shu yakshanba kuni bo‘lib o‘tadigan «Klasiko»da maydonga tushish. La Liganing 35-turi doirasidagi bahsda Mbappening ishtirok etishi bo‘yicha yakuniy qaror chorshanba kuni o‘tkaziladigan MRT tekshiruvidan so‘ng qabul qilinishi kerak edi.

Biroq, COPE jurnalisti Melchor Ruisning ma’lumotiga ko‘ra, chap oyoq son mushaklarining holatini to‘liqroq tekshirish maqsadida tibbiy ko‘rik ertagaga qoldirilgan.

Bugun Kilian trenajyor zali va hovuzda mashg‘ulot o‘tkazdi. Ertaga u jamoaviy mashg‘ulotlarning bir qismida ishtirok etishi kutilmoqda.

Hozirda futbolchining «Kamp Nou»da «Barselona»ga qarshi o‘yinda ishtirok eta olishi borasida ijobiy va optimistik kayfiyat hukm surmoqda.