Килиан Мбаппенинг жароҳатидан тикланиш жараёни ҳақида янги тафсилотлар маълум бўлди.
Аввалроқ, «Реал» ҳужумчиси дам олиш кунларида физиотерапевтлар ва реабилитация мутахассислари билан фаол ишлагани хабар қилинган эди. Француз футболчисининг режаси — шу якшанба куни бўлиб ўтадиган «Класико»да майдонга тушиш. Ла Лиганинг 35-тури доирасидаги баҳсда Мбаппенинг иштирок этиши бўйича якуний қарор чоршанба куни ўтказиладиган МРТ текширувидан сўнг қабул қилиниши керак эди.
Бироқ, COPE журналисти Мельчор Руиснинг маълумотига кўра, чап оёқ сон мушакларининг ҳолатини тўлиқроқ текшириш мақсадида тиббий кўрик эртагага қолдирилган.
Бугун Килиан тренажёр зали ва ҳовузда машғулот ўтказди. Эртага у жамоавий машғулотларнинг бир қисмида иштирок этиши кутилмоқда.
Ҳозирда футболчининг «Камп Ноу»да «Барселона»га қарши ўйинда иштирок эта олиши борасида ижобий ва оптимистик кайфият ҳукм сурмоқда.
