Turinning «Yuventus» klubi bosh murabbiyi Luchano Spalletti jamoa markaziy hujumchisi Dushan Vlaxovichning o‘yini va uning tarkibdagi ahamiyati haqida fikr bildirdi. Serbiyalik forvard jarohati sababli 2025 yilning noyabridan buyon ko‘plab o‘yinlarni o‘tkazib yuborishga majbur bo‘lgan edi.
A Seriyaning 36-turidan o‘rin olgan «Lechche»ga qarshi bahsda Vlaxovich tomonidan kiritilgan yagona gol turinliklarga g‘alaba keltirdi.
«U bizga xuddi nonday zarur edi. Dushan noyob jismoniy ko‘rsatkichlarga ega. Yakkakurashlarda ustunlik qiladigan, to‘p uchun kurashadigan va gol uradigan bunday kuchli hujumchisiz futbol o‘ynash imkonsiz», — dedi murabbiy.
Ma’lumot uchun, Vlaxovich joriy mavsumda «Yuventus» libosida barcha turnirlarda 21 ta o‘yinda maydonga tushib, o‘z hisobiga 8 ta gol va 2 ta golli uzatmani yozdirib qo‘ygan.
