"Inter" hujumchisi Lautaro Martines jamoadoshi, yarim himoyachi Genrix Mxitaryan haqidagi fikrlari bilan o‘rtoqlashdi.
"Mxitaryan — barchamiz uchun haqiqiy o‘rnak. Otam bilan gaplashganimda, u doim kiyinish xonasidagi muhit haqida so‘raydi. Men esa har safar Genrixning qanday ishlashini alohida qayd etaman. Unda buyuk faoliyatni bosib o‘tgan insonlarga xos bo‘lgan kamtarlik bor. Biz undan har kuni nimanidir o‘rganamiz. Kelajagi borasida qanday qarorga kelmasin, bu uning o‘zi va oilasi uchun eng yaxshisi bo‘lishiga umid qilaman. U bizga juda ko‘p narsa berdi", — deya Lautaroning so‘zlaridan iqtibos keltirmoqda DAZN.
Ma’lumot uchun, Genrix Mxitaryan 2022 yilda "Roma"dan erkin agent sifatida "Inter" safiga kelib qo‘shilgan edi. Uning milanliklar bilan amaldagi shartnomasi 2026 yilning 30 iyuniga qadar mo‘ljallangan.
Joriy mavsumda 37 yoshli yarim himoyachi "neradzurrilar" tarkibida barcha turnirlarda jami 36 ta uchrashuvda maydonga tushdi. Ushbu o‘yinlarda u 4 ta gol urdi va 3 ta golli uzatmani amalga oshirdi.
