Saudiya Arabistoni mezbonlik qilayotgan o‘smirlar (U-17) o‘rtasidagi Osiyo kubogining "D" guruhida ikkinchi tur o‘yinlari yakunlandi. O‘zbekiston o‘smirlar terma jamoasi Hindiston ustidan yirik g‘alabaga erishib, muddatidan oldin keyingi bosqich masalasini hal qildi.

Mundial yo‘llanmasi naqd KXDR terma jamoasi musobaqada ishtirok etmasligini ma’lum qilgach, mazkur guruhda uchta jamoa qolgan edi. Birinchi turda Avstraliya Hindistonni 4:0 hisobida mag‘lub etgan bo‘lsa, ikkinchi turda Sergey Chigodayev shogirdlari hindlar darvozasiga javobsiz 3 ta to‘p kiritishdi.

Shu tariqa, Avstraliya va O‘zbekiston guruhdan chiqish vazifasini bajarish bilan birga, Qatarda o‘tadigan o‘smirlar o‘rtasidagi Jahon chempionati yo‘llanmasiga ham ega chiqishdi.

O‘yin xronikasi Uchrashuv davomida to‘liq ustunlikka ega bo‘lgan vakillarimiz 32-daqiqada hisobni ochishdi — Laziz Abduraimov penaltini aniq amaga oshirdi. Ikkinchi bo‘limda raqib futbolchisi Singh o‘z darvozasini ishg‘ol qilib qo‘ygan bo‘lsa, 78-daqiqada Ahror Ravshanbekov yakuniy hisobni o‘rnatdi — 0:3.

Osiyo kubogi U-17 | 2-tur

Hindiston — O‘zbekiston — 0:3

Gollar: Laziz Abduraimov (32, pen), Singh (60, avtogol), Ahror Ravshanbekov (78).

O‘zbekiston U-17: Olim Shomurodov, Muhammadodil Orifxonov (Ahror Ravshanbekov, 60), Mirjamol Anvarov, Muhammad Hakimov, Abubakr Rahimov, Islom Ravshanov, Adis Abdunabiyev, Muhammadjon Mamatov (Mirkomil Murodov, 60), Suhrob Sadirjanov (Jahongirmirzo O‘ktamboyev, 90), Laziz Abduraimov (Rustam Aliyev, 74), Amirxon Erkinov (Farrux Hayitmurodov, 74).

Endi 13 may kuni O‘zbekiston va Avstraliya terma jamoalari o‘zaro to‘qnash kelib, guruh g‘olibini aniqlab olishadi. Vakillarimiz guruhda birinchi o‘rinni egallashlari uchun faqat g‘alaba qozonishlari talab etiladi.