«Manchester Siti» bosh murabbiyi Xosep Gvardiola yarim himoyachi Rodrining Ispaniya terma jamoasining Jahon chempionati uchun qaydnomasiga kirmay qolishi ehtimoli haqida o‘z fikrini bildirdi. Aprel oyida 29 yoshli futbolchi navbatdagi jarohatini oldi va shu sababli «shaharliklar»ning so‘nggi to‘rtta o‘yinini o‘tkazib yubordi.
Matbuot anjumanida jurnalist Jeymi Jekson va Gvardiola o‘rtasida quyidagicha suhbat bo‘lib o‘tdi:
— Pep, Rodrining Jahon chempionatini o‘tkazib yuborish ehtimoli bormi?
— Yo‘q, — deb javob berdi murabbiy.
— Yaxshi, rahmat.
— Arzimaydi. Xo‘sh, agar Luis de la Fuente uni chaqirmasagina, shunday imkoniyat bo‘lishi mumkin, — deya aniqlik kiritdi Gvardiola.
Bugun Toshkent vaqti bilan soat 00:00 da «Manchester Siti»ning «Kristal Pelas»ga qarshi uchrashuvi boshlanadi. Murabbiyning javobi Rodrining jarohati JCH-2026da ishtirok etishga to‘sqinlik qilmasligiga ishora qilmoqda.
