«Real» Madrid bosh murabbiyi Alvaro Arbeloa matbuot anjumanida klub prezidenti Florentino Peresning shov-shuvli bayonotlariga o‘z munosabatini bildirdi. Peres avvalroq «Real»dan yettita chempionlik unvoni «o‘g‘irlangani» va mashhur «Negreyra ishi» haqida gapirgan edi.

— Peresning matbuot anjumani haqida nima deb o‘ylaysiz?

— Men bu yerga prezidentning matbuot anjumanini sharhlash uchun kelganim yo‘q. Biroq har qanday madridist «Real» manfaatlarini himoya qilishimiz kerakligiga qo‘shiladi. Bizga boshqa klublarga qaraganda o‘zgacha (adolatsiz) munosabatda bo‘lishadi.

— Prezident o‘g‘irlangan chempionliklar haqida gapirdi. Siz bunga qo‘shilasizmi?

— Albatta. So‘nggi 20 yil davomida nimalar sodir bo‘lganini hamma biladi — har holda bizga ma’lum bo‘lgan qismini. «Negreyra ishi» oxirigacha yetkazilsa, yaxshi bo‘lardi. Bularning barchasi noqonuniy ekanligi kunday ravshan, dedi Arbeloa.

Eslatib o‘tamiz, Alvaro Arbeloa 2026 yilning yanvar oyida Xabi Alonso o‘rnini egallab, «Real» bosh murabbiyi etib tayinlangan edi. Madridliklar ertaga, 14 may kuni La Liga doirasida «Real Ovyedo»ga qarshi maydonga tushadilar.