«Real» prezidenti Florentino Peres Joze Mourinyoning jamoaga bosh murabbiy etib tayinlanishi mumkinligi haqidagi xabarlarga munosabat bildirdi. Kecha hozirda «Benfika»ni boshqarayotgan portugaliyalik murabbiy Madrid klubi rahbariyati bilan kelishuvga erishgani va kelasi hafta rasmiy bayonot berilishi haqida ma’lumotlar tarqalgan edi.
«Bu haqda so‘rashingizni kutmagandim. Biz hozir jarayonning bu bosqichida emasmiz. Hozirgi vazifamiz — «Real Madrid» uni bizdan tortib olmoqchi bo‘lganlardan emas, balki klub a’zolariga tegishli ekaniga ishonch hosil qilishdir. Men ular bilan gaplashib olmoqchiman, o‘zlarini tanishtirishsin. Ulardan hayoti davomida «Real» uchun nima qilishganini so‘ramoqchiman.
Men «Madrid»ga qarshi qaratilgan bu bema’ni kampaniyaga chek qo‘yishim kerak. Vaholanki, «Madrid» hech qachon hozirgidek shon-shuhratga burkanmagan edi. Meni klub tarixidagi, hatto barcha klublar tarixidagi eng yaxshi prezident deb saylashdi, buni aytishdan uyalaman. Bugun biz futbol haqida gaplashmaymiz», — dedi Peres matbuot anjumanida.
