«Реал» президенти Флорентино Перес Жозе Моуриньонинг жамоага бош мураббий этиб тайинланиши мумкинлиги ҳақидаги хабарларга муносабат билдирди. Кеча ҳозирда «Бенфика»ни бошқараётган португалиялик мураббий Мадрид клуби раҳбарияти билан келишувга эришгани ва келаси ҳафта расмий баёнот берилиши ҳақида маълумотлар тарқалган эди.

«Бу ҳақда сўрашингизни кутмагандим. Биз ҳозир жараённинг бу босқичида эмасмиз. Ҳозирги вазифамиз — «Реал Мадрид» уни биздан тортиб олмоқчи бўлганлардан эмас, балки клуб аъзоларига тегишли эканига ишонч ҳосил қилишдир. Мен улар билан гаплашиб олмоқчиман, ўзларини таништиришсин. Улардан ҳаёти давомида «Реал» учун нима қилишганини сўрамоқчиман.

Мен «Мадрид»га қарши қаратилган бу бемаъни кампанияга чек қўйишим керак. Ваҳоланки, «Мадрид» ҳеч қачон ҳозиргидек шон-шуҳратга бурканмаган эди. Мени клуб тарихидаги, ҳатто барча клублар тарихидаги энг яхши президент деб сайлашди, буни айтишдан уяламан. Бугун биз футбол ҳақида гаплашмаймиз», — деди Перес матбуот анжуманида.