Madridning «Real» klubi yarim himoyachisi Federiko Valverde faoliyatini Angliya Premyer-ligasida davom ettirishi mumkin. Bu haqda Daily Star nashri xabar bermoqda.

Ma’lumotlarga ko‘ra, urugvaylik futbolchining transferiga «Manchester Yunayted» jiddiy qiziqish bildirmoqda. «Qizil iblislar» Madrid klubi ichidagi notinch vaziyat — Valverde va uning jamoadoshi Orelyen Tchuameni o‘rtasida kelib chiqqan janjal fonida ushbu transferni amalga oshirishga harakat qilib ko‘rmoqchi.

Hozircha «qaymoqranglilar» rahbariyati yarim himoyachining kelajagi borasida yakuniy qarorga kelgani yo‘q.

Ma’lumot uchun, Federiko Valverde 2016 yilda «Penyarol» klubidan 5 million yevro evaziga «Real»ga o‘tgan edi. Uning madridliklar bilan amaldagi shartnomasi 2029 yilning 30 iyuniga qadar mo‘ljallangan.

Joriy mavsumda urugvaylik futbolchi «Real» safida barcha turnirlarda 48 ta uchrashuvda maydonga tushib, o‘z hisobiga 9 ta gol va 13 ta golli uzatmani yozdirib qo‘ydi.