Italiya A Seriyasining joriy mavsumida «Yuventus» klubi ishtirokidagi uchrashuvlarning deyarli yarmida raqiblar darvozaga yo‘llagan ilk aniq zarbasi bilanoq hisobni ochishga muvaffaq bo‘lishmoqda.

Xususan, chempionatning 37-turidan o‘rin olgan bahsda «Fiorentina» jamoasining Turin klubi darvozasi tomon yo‘llagan birinchi aniq zarbasi gol bilan yakunlandi. Uchrashuvning 34-daqiqasida Cher Ndur «byankonerilar» darvozasini ishg‘ol qilishga erishdi.

Statistik ma’lumotlarga ko‘ra, «Yuventus» joriy mavsumda o‘z darvozasiga yo‘llangan dastlabki 35 ta aniq zarbaning 16 tasida gol o‘tkazib yuborgan. Bu 46 foizlik ko‘rsatkich demakdir va ushbu natija bilan turinliklar A Seriyada peshqadam bo‘lib turibdi.

Ma’lumot uchun, A Seriyaning joriy mavsumida «Yuventus» darvozasini ikki nafar posbon qo‘riqladi. Mikele Di Gregorio 30 ta o‘yinda maydonga tushgan bo‘lsa, Mattia Perin 8 ta uchrashuvda jamoa darvozasini qo‘riqlagan.