«Pari Sen-Jermen» darvozaboni Lyuka Shevalye yaqinlashib kelayotgan transfer oynasida klubni tark etishi mumkin. Fransiyalik posbon uchun «PSJ»dagi debyut mavsumi o‘ta muvaffaqiyatsiz kechdi: u Matvey Safonov bilan raqobatda imkoniyatni boy berib qo‘ydi, mavsum yakunida esa jarohat olib safdan chiqdi va Fransiya terma jamoasining Jahon chempionati uchun qaydnomasidan tashqarida qoldi.

Jurnalist Ekrem Konurning Turkiya OAVlariga tayanib xabar berishicha, «Fenerbaxche» klubi Shevalyeni o‘z safiga qo‘shib olishga qiziqish bildirmoqda. Istanbul klubida 24 yoshli darvozabon kelajagi mavhum bo‘lib turgan Edersonning o‘rnini egallashi mumkin.

O‘tgan yilning avgust oyida Parij grandi Shevalyeni «Lill»dan 40 million yevro evaziga sotib olgan edi. Lyuka Luis Enrike jamoasida umumiy hisobda 26 ta uchrashuv o‘tkazib, o‘z darvozasidan 28 ta to‘p o‘tkazib yubordi.