Eron TIV matbuot kotibi Esmail Bagai AQSHni JCH-2026da ishtirok etishi kerak bo‘lgan Eron terma jamoasiga viza berish masalasida o‘z majburiyatlarini buzganlikda aybladi.

Eron jamoasi guruh bosqichidagi barcha uchta o‘yinini AQSHda o‘tkazishi kerak, biroq fevral oyi oxirida AQSH va Isroilning Eronga qilgan hujumidan beri eronliklarning 11 iyundan 19 iyulgacha bo‘lib o‘tadigan turnirdagi ishtiroki so‘roq ostida qolmoqda. Eron o‘yinlarni Meksikaga ko‘chirishni so‘ragan, ammo FIFA prezidenti Janni Infantino barcha uchrashuvlar avvaldan rejalashtirilgan stadionlarda o‘tkazilishi shartligini ta’kidlamoqda.

Shu oy boshida Vankuverda bo‘lib o‘tgan FIFA Kongressiga Eron futbol federasiyasi (FFIRI) prezidenti Mehdi Tajning Islom inqilobi qo‘riqchilari korpusi (IIQK) bilan aloqalari sababli Kanadaga kiritilmagani qo‘shimcha muammolarni keltirib chiqardi.

«Eron milliy terma jamoasi va murabbiylar shtabiga Jahon chempionatida ishtirok etish uchun viza berish mezbon davlatlar rasmiylarining mas’uliyati hisoblanadi – reglamentga ko‘ra, FIFA biz tomonda. Ikki kun avval federasiya rahbariyati bilan samarali uchrashuv bo‘lib o‘tdi va bizni FIFA mezbon davlatlar tomonidan reglamentga rioya qilinishini ta’minlash uchun barcha imkoniyatlarni ishga solishiga ishontirishdi.

AQSH mehmonlarni qabul qilish bo‘yicha o‘z majburiyatlarini bir necha bor buzganligiga shubha yo‘q va Eron terma jamoasining ayrim a’zolariga viza berilmasligi haqidagi gaplar qabul qilinishi mumkin emas. Federasiya bu masalani jiddiy kuzatib bormoqda va biz terma jamoamizning Jahon chempionatida muvaffaqiyatli ishtirok etishi uchun bor kuchimizni safarbar etamiz», — deya Bagaining so‘zlarini keltiradi Tasnim axborot agentligi.