Niderlandiyaning «Ayaks» klubi keyingi mavsum uchun bosh murabbiy lavozimiga Ernesto Valverde nomzodini ko‘rib chiqqan edi. Bu haqda AS nashri xabar bermoqda.

Manbaning xabariga ko‘ra, Amsterdam klubi sport direktori Yordi Kroyf ispaniyalik mutaxassisning faoliyati bilan juda yaxshi tanish va Valverde Bilbaoning «Atletik» klubini tark etishi ma’lum bo‘lganidan keyin uning nomzodiga qiziqish bildirgan. Biroq Valverde yaqin orada keladigan har qanday taklifni rad etishga va faoliyatida tanaffus qilishga qaror qildi.

«Menga dam olish kerak, mavsum juda shiddatli o‘tdi. Hozir aniq murabbiylik qilmayman. Menga tanaffus zarur», – deya ma’lum qildi mutaxassis.

Valverdening rad javobidan so‘ng «Ayaks» bosh murabbiyligiga asosiy nomzod sifatida «Jirona» ustozi Michel ko‘rilmoqda, biroq hozircha rasmiy kelishuvga erishilgani yo‘q.