Braziliya terma jamoasi va «Liverpul» darvozaboni Alisson Beker, agar Turin jamoasi joriy mavsum yakunlariga ko‘ra Chempionlar ligasiga yo‘llanma ololmasa ham, «Yuventus»ga o‘tishga tayyor. Bu haqda La Gazzetta dello Sport nashri xabar bermoqda.

Nashr ma’lumotlariga ko‘ra, «Yuventus»ning A Seriya turnir jadvalidagi vaziyatiga qaramay, braziliyalik posbonning atrofidagilar uning turinliklar safinda to‘p surish istagi borligini tasdiqlashgan.

Italiya chempionati mavsumi tugashiga bir tur qolganda Luchano Spalletti jamoasi 68 ochko jamg‘argan holda turnir jadvalida oltinchi o‘rinni egallab turibdi. Beshinchi pog‘onadan esa xuddi shunday 68 ochko bilan «Komo» joy olgan. «Roma» va «Milan» 70 tadan ochko bilan tegishli ravishda to‘rtinchi va uchinchi o‘rinlarni band etishgan.

Joriy mavsumda Alison Beker klub safida barcha turnirlarda 34 ta uchrashuvda maydonga tushib, o‘z darvozasidan 36 ta gol o‘tkazib yubordi va 13 ta o‘yinda darvozasi daxlsizligini saqlab qoldi. Transfermarkt portalining bahosiga ko‘ra, 33 yoshli golkiperning bozor qiymati 17 million yevroni tashkil etadi.