«Atalanta» yarim himoyachisi Ederson «Manchester Yunayted»ga o‘tishga juda yaqin turibdi. Klublar braziliyalik futbolchining transferi bo‘yicha muzokaralarda sezilarli darajada oldinga siljishdi — tez orada to‘liq kelishuvga erishilishi mumkin.

Taniqli insayder Nikolo Skiraning xabar berishicha, tomonlar hali bonus tizimi tuzilmasini tartibga solishlari kerak, biroq kelishuvning barcha ishtirokchilari ushbu transfer amalga oshishiga to‘liq ishonmoqdalar. Transfer «qizil iblislar»ga 45 million yevroga tushadi. 26 yoshli futbolchi Angliya grandi bilan 2031 yilgacha mo‘ljallangan, yillik maoshi 5 million yevroni tashkil etadigan shartnoma imzolaydi.

Bundan oldin Ederson uchun kurashda Madridning «Atletiko» klubi asosiy favorit sifatida tilga olinayotgan edi. Joriy mavsumda havbek «Atalanta» safida barcha turnirlarda 41 ta o‘yinda maydonga tushib, 3 ta gol va 2 ta golli uzatmani o‘z hisobiga yozdirib qo‘ydi.