«Аталанта» ярим ҳимоячиси Эдерсон «Манчестер Юнайтед»га ўтишга жуда яқин турибди. Клублар бразилиялик футболчининг трансфери бўйича музокараларда сезиларли даражада олдинга силжишди — тез орада тўлиқ келишувга эришилиши мумкин.

Таниқли инсайдер Николо Скиранинг хабар беришича, томонлар ҳали бонус тизими тузилмасини тартибга солишлари керак, бироқ келишувнинг барча иштирокчилари ушбу трансфер амалга ошишига тўлиқ ишонмоқдалар. Трансфер «қизил иблислар»га 45 миллион еврога тушади. 26 ёшли футболчи Англия гранди билан 2031 йилгача мўлжалланган, йиллик маоши 5 миллион еврони ташкил этадиган шартнома имзолайди.

Бундан олдин Эдерсон учун курашда Мадриднинг «Атлетико» клуби асосий фаворит сифатида тилга олинаётган эди. Жорий мавсумда ҳавбек «Аталанта» сафида барча турнирларда 41 та ўйинда майдонга тушиб, 3 та гол ва 2 та голли узатмани ўз ҳисобига ёздириб қўйди.