«Inter Mayami» yarim himoyachisi Telasko Segoviya «Manchester Yunayted» yulduzi Kazemironing Amerika klubiga o‘tishi haqidagi xabarlarni amalda tasdiqladi.
ESPN nashrining yozishicha, venesuelalik futbolchi Kazemironing jamoaga kelishini ijobiy baholab, uni katta kuch sifatida e’tirof etgan:
«Men Kazemiro kelayotganini bilaman. U – buyuk futbolchi. Agar bu sodir bo‘lsa, biz uni katta xursandchilik bilan kutib olamiz. Ishonamanki, u jamoamizga juda katta foyda keltiradi», — dedi Segoviya.
Eslatib o‘tamiz, «Manchester Yunayted» avvalroq 34 yoshli braziliyalik futbolchi mavsum yakunida erkin agent sifatida klubni tark etishini e’lon qilgan edi. Kazemiro o‘z faoliyati davomida «Real Madrid» safida besh marta Chempionlar ligasi g‘olibi bo‘lgan, shuningdek, «San-Paulu» va «Portu» klublari sharafini himoya qilgan.
Joriy mavsumda «qizil iblislar» tarkibida 35 ta uchrashuvda maydonga tushgan yarim himoyachi 9 ta gol va 2 ta golli uzatmaga mualliflik qildi. Transfermarkt portali futbolchining transfer qiymatini 8 million yevroga baholamoqda.
