«Liverpul» hujumchisi Muhammad Saloh A Seriyaga qaytishi mumkin. La Repubblica nashrining xabariga ko‘ra, misrlik futbolchiga «Yuventus» jiddiy qiziqish bildirmoqda.

Turin klubi bosh murabbiyi Luchano Spalletti hujumchini o‘zining yangilanayotgan jamoasining bosh yulduziga aylantirmoqchi. E’tiborli jihati, Saloh avvalroq (2016-2017 yillarda) «Roma»da aynan Spalletti qo‘l ostida to‘p tepgan.

Salohning «Fiorentina» va «Roma»dagi tajribasi uning Italiya futboliga moslashishi uchun vaqt talab etmasligini anglatadi. Uning yuqori samaradorligi esa Salohni transfer bozoridagi eng jozibador erkin agentlardan biriga aylantirmoqda.

Eslatib o‘tamiz, Muhammad Saloh 1 iyul kuni «Liverpul»ni tark etadi. U «qizillar» sharafini 2017 yildan beri himoya qilib kelayotgan edi.