Milanning «Inter» klubi markaziy himoyachisi Alessandro Bastoni kelayotgan yozda «Barselona»ga o‘tmaydi. Italiyalik futbolchi uzoq vaqt davomida «ko‘k-anorranglilar»ning ustuvor maqsadi hisoblanib kelingan, ammo yakunda Kataloniya klubi hujum chizig‘ini kuchaytirishga e’tibor qaratishga qaror qildi.

Yaqinda «Barsa» «Nyukasl» vingeri Entoni Gordonning 70-80 million yevro evaziga transferi bo‘yicha kelishuvga erishdi. Diario Sport nashrining xabar berishicha, bu qaror Bastoni bilan bog‘liq bitimga yakuniy nuqtani qo‘ydi.

Katta ehtimol bilan «Barselona» hujum chizig‘iga investisiya kiritishda davom etadi. Ayni paytda Madridning «Atletiko» klubi hujumchisi Xulian Alvaresni o‘z safiga qo‘shib olish borasidagi gap-so‘zlar tinmayapti.

Ma’lumot uchun, Alessandro Bastonining bozor qiymati Transfermarkt portali tomonidan 75 million yevroga baholanmoqda.