«Tottenxem» klubiga egalik qiluvchi Jo Lyuis oilasi mavsum yakunlari bo‘yicha muxlislarga rasmiy bayonot bilan chiqib, jamoada keng ko‘lamli qayta qurish ishlari boshlanishini ma’lum qildi.
2025/2026 yilgi mavsumda «shporlar» turnir jadvalida 17-o‘rinni egallashdi. Jamoa faqat so‘nggi turda «Everton» ustidan qozonilgan g‘alaba (1:0) tufayli Premyer-ligadan chiqib ketish xavfidan qutulib qoldi.
Muxlislarga yo‘llangan murojaatdan asosiy nuqtalar:
-
Mas’uliyat: «Klub egalari sifatida biz «Tottenxem» hozirda tushib qolgan holat uchun to‘liq javobgarlikni o‘z zimmamizga olamiz. 17-o‘rin klubimiz maqomiga mutlaqo mos emas».
-
Sotmaslik va Investisiya: «Biz klubni sotmoqchi emasmiz. Aksincha, akademiya, asosiy jamoa va barcha xizmatlarga katta miqdorda sarmoya kiritishga tayyormiz».
-
O‘zlikni tiklash: «Maqsadimiz — «Tottenxem»ning o‘ziga xos bo‘lgan jasur va hujumkor o‘yin uslubini qaytarish. Futbol biz uchun birinchi o‘rinda bo‘ladi».
-
O‘zgarishlar davri: «Zarur o‘zgarishlar ko‘p vaqt va kuch talab etadi, ammo bu jarayon allaqachon boshlandi».
Eslatib o‘tamiz, 24 may kuni bo‘lib o‘tgan hal qiluvchi o‘yinda Joau Palinya tomonidan urilgan yagona gol «Tottenxem»ni elitada saqlab qolgan edi. Klub rahbariyati yaqin oylar ichida ishlab chiqilgan rejalarni amalga oshirishga va’da bermoqda.
