Ukraina futbol assosiasiyasi (UAF) prezidenti Andrey Shevchenko «Chelsi» vingeri Mixail Mudrikning doping sababli to‘rt yilga futboldan chetlatilgani haqida fikr bildirdi. Shuningdek, u qoidabuzarlik milliy terma jamoa ixtiyorida sodir bo‘lgani haqidagi ayblovlarni rad etdi.

«Birinchidan, UAF hech qachon bu vaziyatda nizolashuvchi tomon bo‘lmagan. Bizning pozisiyamiz bitta: biz Mixailga ishonamiz va uning hamma ishni to‘g‘ri qilganiga imonimiz komil. Uning qaytishini kutamiz. Biz doimo yuristlar tomonidan yuborilgan so‘rovlarga javob berganmiz va qo‘limizdan kelgan barcha ma’lumotlarni taqdim etganmiz.

Mudrikning yuristlari bilan doimiy muloqotda bo‘ldik. Hozirda Mixail Angliya futbol assosiasiyasidan to‘rt yillik «ban» olgan. U ushbu qaror ustidan apellyasiya berdi va tez orada Lozannadagi sud (CAS) bu ishni ko‘rib chiqadi. Umid qilamizki, ular to‘g‘ri qaror qabul qilib, diskvalifikasiya muddatini qisqartirishadi.

Yana bir bor qaytaraman, Ukraina futbol assosiasiyasiga nisbatan «sizlar aybdorsiz» degan ma’noda hech qanday da’vo yo‘q. Yuridik sir tufayli hamma detallarni ochiqlay olmayman, lekin biz yordam berish uchun maksimal ma’lumotlarni berdik», — dedi Shevchenko «Bombardir» YouTube-kanaliga bergan intervyusida.