«Arsenal» sobiq yarim himoyachisi Patrik Viyeyra 2025/2026 yilgi mavsumda «kanonirlar»ning chempionlikni qo‘lga kiritishida bosh murabbiy Mikel Artetaning roli haqida gapirdi. Bundan tashqari, londonliklar bugun UEFA Chempionlar ligasi finalida «PSJ»ga qarshi maydonga tushishadi.
«Mikel Arteta ushbu tarixning ajralmas qismiga aylandi. Dastlabki ikki yil u uchun juda qiyin kechdi, lekin u doimo o‘z prinsiplariga sodiq qoldi. U nimani xohlayotganini juda yaxshi bilardi. Arteta jamoani qurish uchun qiyin qarorlar qabul qildi va o‘z g‘oyalariga mos kelmagan muhim futbolchilarni qo‘yib yubordi.
Men bizning davrimiz bilan o‘xshashliklar haqida gapirgandim. Eng muhimi — xuddi ilgari Arsen Venger qilganidek, umumiy maqsadga ega bo‘lgan ahil jamoani shakllantirish qobiliyatidir. Arsen «Arsenal» DNKsiga mos keladigan oilaviy muhitni yaratgan edi va Mikel Arsendan keyin yo‘qolib ketgan ushbu g‘oyani qayta tiklashga va rivojlantirishga muvaffaq bo‘ldi», — deya Viyeyraning so‘zlarini keltiradi L'Equipe.
