Joze Mourinyu Madridning «Real» klubiga qaytmoqda. Portugaliyalik mutaxassis faoliyatida ikkinchi bor «qaymoqranglilar» bosh murabbiyiga aylanadi. Bu haqda Florentino Peres prezidentlik saylovlaridagi g‘alabasidan so‘ng ma’lum qildi.
Jurnalist Xose Luis Sanchesning bergan ma’lumotlariga ko‘ra, klub «The Special One» tayinlanganini bugun, ya’ni dushanba kuniyoq rasman e’lon qiladi. Murabbiyning taqdimot marosimi esa, katta ehtimol bilan, chorshanba kuni bo‘lib o‘tadi.
Eslatib o‘tamiz, Mourinyu o‘zining dastlabki tashrifi davrida «Real»ni uch yil davomida — 2010 yildan 2013 yilgacha boshqargan edi. Ushbu mutaxassis qo‘l ostida jamoa bir martadan La Liga, Ispaniya Kubogi va mamlakat Superkubogida zafar quchgan, shuningdek, uch bor Chempionlar ligasining yarim finaliga qadar yetib borgan.
