Angliyaning “Arsenal” klubi va Ispaniya terma jamoasi yarim himoyachisi Mikel Merino 2026 yilgi Jahon chempionati oldidan milliy terma jamoaning holati haqidagi savolga javob berdi. Ispaniyaliklar "N" guruhida Kabo-Verde, Saudiya Arabistoni va Urugvay terma jamoalariga qarshi bahs olib borishadi.
– Turnir oldidan Ispaniya terma jamoasining holatini qanday baholaysiz?
– Biz juda yaxshi tayyorgarlik ko‘rganmiz. Tarkibimizda yoshlik, kuch-quvvat va sovrinlar yutishga bo‘lgan kuchli ishtiyoq uyg‘unlashgan. Bundan tashqari, biz Yevropa chempionlarimiz, ungacha esa Millatlar ligasida g‘olib chiqqanmiz. Shuningdek, jamoaga yoshlar terma jamoasida biz bilan birga bo‘lgan va murabbiylar shtabi juda yaxshi biladigan yosh futbolchilarni ham jalb etdik. Ushbu omillarning o‘zaro uyg‘unligi muvaffaqiyat kalitidir.
Eng muhimi esa — bizning kundalik tartibimiz, barcha futbolchilar o‘rtasidagi muloqot, bir-birimiz bilan qanchalik yaxshi chiqishishimiz va kiyinish xonasida yarata olganimiz oilaviy muhitdir. Bularning barchasi muvaffaqiyat uchun ajoyib resept hisoblanadi, biroq baribir katta bosim ostida maydonga tushganingda mayda detallar ham sening foydangga ishlashi kerak bo‘ladi. Shunga qaramay, biz bu chaqiruvga tayyormiz, — deya Merinoning so‘zlarini keltiradi FIFA rasmiy sayti.
