Madridning «Real» klubi yangi bosh murabbiyi Joze Mourinyo jamoaning sobiq futbolchilaridan birini o‘z murabbiylar shtabiga taklif qilmoqchi. Bu haqda Marca gazetasi jurnalistlari xabar tarqatmoqda.
Manba bergan ma’lumotlarga ko‘ra, «The Special One» laqabli murabbiyning shtabidan germaniyalik sobiq futbolchi Sami Xedira joy olishi mumkin. Ushbu yarim himoyachi 2010 yildan 2015 yilgacha «qirollik klubi» sharafini himoya qilgan.
Eslatib o‘tamiz, Joze Mourinyo yaqindagina «qaymoqranglilar» boshqaruviga qaytdi. Portugaliyalik mutaxassis «Real» bilan uch yilga mo‘ljallangan uzoq muddatli shartnoma imzolagan.
Yakunlangan mavsumda Madrid grandi muvaffaqiyatsiz ishtirok etdi va hech bir sovrinni qo‘lga kirita olmadi.













