«Manchester Siti» direktorlar kengashi raisi Xaldun al-Muborak jamoaning yangi bosh murabbiyi etib Enso Mareska tayinlangani haqida fikr bildirdi.

«Enso murabbiylik faoliyati davomida doimo yangi chaqiriqlarni izlab kelgan va yuqori natijalarga intilib yashagan mutaxassisdir. U xarizma, ishga bo‘lgan yuksak ishtiyoq va chuqur futbol tafakkurini o‘zi bilan olib keladi. Aynan shu sifatlar bizga kerak.

U maqsad va ambisiyalari o‘ziniki bilan to‘liq mos keladigan klubga qaytmoqda. Shuning uchun ham Ensoning «Manchester Siti»ga qaytishi u uchun ham, klubimiz uchun ham tabiiy va kutilgan qadam bo‘ldi.

Uning ixtiyorida o‘zining futbol falsafasini amalga oshirish va yanada rivojlantirish uchun juda mos jamoa hamda futbol tuzilmasi bo‘ladi. Uning klubning kelajakdagi muvaffaqiyatlariga qanday hissa qo‘shishini katta qiziqish bilan kutmoqdamiz. Xush kelibsan, Enso», — dedi al-Muborak klub rasmiy saytiga bergan intervyusida.

Eslatib o‘tamiz, Enso Mareska «Manchester Siti» bosh murabbiyi lavozimida Xosep Gvardiola o‘rnini egalladi.