Fransiya terma jamoasi vingeri Bredli Barkolya milliy jamoadagi sherigi Maykl Olisening o‘yinini yuqori baholadi. Olise Jahon chempionatining 1/16 finalida Shvesiyaga qarshi o‘yinda (3:0) ikkita golli uzatmani amalga oshirdi. Uning hisobida ushbu turnirda jami 5 ta assist bor.
«U maydonda hamma narsani qiladi. U himoyada ham, to‘p bilan ham tinimsiz mehnat qiladi, ajoyib uzatmalar beradi, xavf tug‘diradi va u bilan o‘ynash — haqiqiy zavq. U gol urishga ham qodir va bunga yaqin kelgandi, ammo gollar hali keladi. U daho. Men uni daho deb hisoblayman», — dedi Barkola.
