26 yoshli markaziy yarim himoyachi Sandro Tonali «Nyukasl»dan Londonning «Tottenxem» klubiga ko‘chib o‘tdi. Bu haqda taniqli insayder Nikolo Skira xabar bermoqda.
Manbaning bergan ma’lumotlariga ko‘ra, italiyalik futbolchi «Tottenxem» bilan 2032 yilga qadar mo‘ljallangan mehnat shartnomasini imzolagan. Ta’kidlanishicha, Tonalining Londondagi maoshi bonuslar bilan birgalikda 12 million yevroni tashkil qiladi.
Yarim himoyachi 2023 yildan buyon «Nyukasl» sharafini himoya qilib kelayotgan edi. Ortda qolgan mavsumda u barcha turnirlarda 53 ta o‘yinda maydonga tushib, 3 ta gol urdi va o‘z hisobiga 7 ta golli uzatmani yozdirib qo‘ydi.
Avvalroq, «Tottenxem»ga Tonalining transferi 117 million yevroga tushishi xabar qilingan edi.
