26 ёшли марказий ярим ҳимоячи Сандро Тонали «Ньюкасл»дан Лондоннинг «Тоттенхэм» клубига кўчиб ўтди. Бу ҳақда таниқли инсайдер Николо Скира хабар бермоқда.
Манбанинг берган маълумотларига кўра, италиялик футболчи «Тоттенхэм» билан 2032 йилга қадар мўлжалланган меҳнат шартномасини имзолаган. Таъкидланишича, Тоналининг Лондондаги маоши бонуслар билан биргаликда 12 миллион еврони ташкил қилади.
Ярим ҳимоячи 2023 йилдан буён «Ньюкасл» шарафини ҳимоя қилиб келаётган эди. Ортда қолган мавсумда у барча турнирларда 53 та ўйинда майдонга тушиб, 3 та гол урди ва ўз ҳисобига 7 та голли узатмани ёздириб қўйди.
Аввалроқ, «Тоттенхэм»га Тоналининг трансфери 117 миллион еврога тушиши хабар қилинган эди.
