«Andijon» — «Enisey» (1:1) o‘rtasidagi o‘rtoqlik uchrashuvidan keyin andijonliklar bosh murabbiyi Islom Ahmedov klub matbuot xizmatiga o‘z taassurotlari bilan o‘rtoqlashdi.

— O‘yindan qoniqish hosil qildingizmi?

— O‘yindan qoniqish bor. Yigitlarimizda ijobiy tomonga juda yaxshi o‘sish kuzatilmoqda. Lekin baribir «100 foiz qoniqdik» desak, ishlashdan to‘xtab qolamiz. Albatta, yana ishlashimiz kerak bo‘lgan jihatlarimiz borligi ko‘rindi. Umuman olganda, yigitlarning harakatlari yaxshi bo‘ldi. Juda ko‘p imkoniyatlarimiz bo‘ldi. Yakuniy bosqichda kamchiliklarimiz sezildi. Eng yoqqan tomoni, futbolchilarimiz bor kuchini berib, oxirigacha kurashishdi va har qanday qiyin vaziyatda ham bosiqlik bilan to‘pni paslar orqali olib chiqishga harakat qilishdi.

— Raqib bosh murabbiyi o‘yin davomida ancha asabiylashib, shogirdlariga e’tirozlar bildirdi...

— Har bir murabbiyning o‘z qarashi bor. To‘g‘risi, raqib murabbiyiga e’tibor bermadim. Bor diqqat-e’tiborimni o‘z jamoamga qaratdim.

— 1:1 hisobi o‘yinga mos tushdi, deb o‘ylaysizmi?

— Raqibga nisbatan ko‘proq hujum qildik, ko‘proq vaziyatlar yaratdik. Biroq ularda ham imkoniyatlar bo‘ldi. Shunga qaramay, ko‘proq bizdagi vaziyatlar xavfliroq chiqdi. G‘alaba qozonishimiz mumkin edi. Buning uchun imkoniyatimiz ham bor edi. Faqat hujumlarda so‘nggi nuqtani qo‘yishda ozgina sovuqqonlik va aniqlik yetishmadi.

— Murabbiy sifatida ushbu o‘yindan o‘zingiz rejalashtirgan barcha jihatlarni oldingizmi?

— Yig‘in yakuniga yetib boryapmiz. Mashg‘ulotlardagi ishlanmalarimiz o‘z samarasini ko‘rsata boshladi. Bu hali charchoq fonida shunday ko‘rinyapti. Xudo xohlasa, futbolchilar tetik holatga kelgach, yanada yaxshiroq o‘yin namoyish eta olamiz.