Italiyaning «Napoli» klubi 29 yoshli shotlandiyalik yarim himoyachi Skott Maktominay bilan mehnat shartnomasini uzaytirishni rejalashtirmoqda. Bu haqdagi ma’lumotni insayder Nikolo Skira e’lon qildi.

Manbaning xabariga ko‘ra, neapolliklar Maktomineyga shartnomani yana bir mavsumga uzaytirish imkoniyati bilan 2030 yilgacha mo‘ljallangan yangi bitim taklif qilishadi. Bundan tashqari, «Napoli» futbolchining maoshini sezilarli darajada — yiliga 4,4 million yevrodan 7 million yevrogacha oshirishga tayyor. Biroq, Maktominay bir mavsum uchun 10 million yevro maosh olishni istayotgani qayd etilgan.

Yakunlangan mavsumda yarim himoyachi barcha turnirlarda 44 ta o‘yinda maydonga tushib, 14 ta gol urdi va to‘rtta golli uzatmaga mualliflik qildi. Maktominayning «Napoli» bilan amaldagi shartnomasi 2028 yilga qadar mo‘ljallangan.