Germaniya terma jamoasi sobiq yarim himoyachisi Bastian Shvaynshtayger Germaniya futbol ittifoqini (DFB) Yurgen Kloppni terma jamoa bosh murabbiyligiga asosiy nomzod sifatida vaqtli va ochiqchasiga e’lon qilgani uchun tanqid qildi.

Shvaynshtayger muqobil variantlar mavjudligini ta’minlash uchun nomzodlarni ko‘rib chiqish masalasida ehtiyotkor bo‘lish zarurligini ta’kidladi. Futbol sohasidagi mahorat va bilim borasida u Lotar Matteus va Mattias Zammerning imkoniyatlarini ham yuqori baholadi. Bundan tashqari, u Germaniya terma jamoasining yangi murabbiyidan juda katta narsa kutmaslik kerakligini aytib o‘tdi.

«Biz eng tubdamiz. Men uchun Yurgen Klopp — jarohatni davolovchi bog‘lam kabidir. Ammo bu jarohat butunlay bitib ketadimi, yo‘qmi — bilmayman; yaqin yillarda hozirgi futbolchilar avlodi bilan juda katta hajmdagi ishlarni bajarishimizga to‘g‘ri keladi.

Agar bizda boshqa mamlakatlar yana: "Oh, nemislar, ular kuchli, biz ularni hurmat qilamiz va ulardan qo‘rqamiz", deb gapiradigan milliy terma jamoamiz bo‘lganida, men bundan juda xursand bo‘lardim. Lekin hozir bizda bunday jamoa yo‘q», — Shvaynshtaygerning so‘zlarini Eurosport keltirmoqda.