Bugun O‘zbekiston futbol assosiasiyasi tomonidan «Iqtidorli murabbiylar» konferensiyasining ilk kuni boshlandi. Anjuman murabbiylar ta’limi sifatini oshirish, ularning malakasini zamon talablari asosida rivojlantirish hamda seleksiya tizimini takomillashtirishga qaratilgan.

Konferensiyaning ochilish marosimida O‘zbekiston futbol assosiasiyasi birinchi vise-prezidenti Ravshan Ermatov mamlakatimizda futbolni rivojlantirishga qaratilayotgan e’tibor, sohada amalga oshirilayotgan tizimli islohotlar hamda bu jarayonda murabbiylar ta’limining ahamiyati haqida so‘z yuritdi.

Uning ta’kidlashicha, so‘nggi yetti yil davomida futbol sohasiga oid 9 ta Prezident qarori qabul qilingan bo‘lib, bu mamlakatda futbol taraqqiyotiga qaratilayotgan yuksak e’tiborning yaqqol ifodasidir.

«Murabbiylarda doimo takliflar va g‘oyalar bo‘ladi. Ana shunday masalalarni ochiq konferensiyalarda muhokama qilishimiz, futbol taraqqiyoti uchun ilmiy asoslangan yondashuvlarni keng joriy etishimiz kerak», — dedi Ravshan Ermatov.

Tadbirda O‘zbekiston futbol assosiasiyasi vise-prezidenti Odil Ahmedov hamda O‘zbekiston milliy terma jamoasi bosh murabbiyi Fabio Kannavaro ham ishtirok etib, zamonaviy futbolning rivojlanish tendensiyalari, yosh futbolchilar bilan ishlash tamoyillari va futbol akademiyalarining ahamiyati haqida o‘z fikrlari bilan o‘rtoqlashdi.

Konferensiyada mamlakatimizning turli hududlaridan tashrif buyurgan bolalar futboli va klublar murabbiylari qatnashib, yosh futbolchilarni tayyorlash, zamonaviy murabbiylik yondashuvlari hamda futbol taraqqiyotining dolzarb masalalari bo‘yicha tajriba almashmoqda.