«Bolonya»ning markaziy himoyachisi Jon Lukumi «Yuventus»ga o‘tishga rozilik berdi.

28 yoshli futbolchi joriy transfer oynasida «keksa sinyora» safiga borib qo‘shilishga tayyorligini bildirdi. Jurnalist Nikolo Skiraning ma’lumotiga ko‘ra, kolumbiyalik futbolchini taklif qilingan shartlar — yiliga 2,5 million yevro maosh bilan besh yillik shartnoma qanoatlantirgan. O‘yinchida boshqa klublardan ham takliflar bor edi, ammo u turinliklar variantini ma’qul ko‘rdi.

«Yuventus» endi transfer shartlarini «Bolonya» bilan kelishib olishi kerak. Manbaga ishonadigan bo‘lsak, «rossoblu»lar markaziy himoyachi uchun taxminan 25 million yevro so‘rashmoqda. Muzokaralar davom etmoqda.

O‘tgan mavsumda Lukumi 43 ta o‘yinda maydonga tushib, bittadan gol va assist muallifi bo‘ldi.