«Bavariya» prezidenti Gerbert Xayner Bundesliga klublarining xorijiy turnelar orqali chempionatni xalqaro maydonda targ‘ib qilish borasida yetarlicha harakat qilmayotganini keskin tanqid qildi. 72 yoshli funksioner bu haqda myunxenliklarning Osiyo bo‘ylab mavsum oldi turnesi yakunida to‘xtalib o‘tdi.
«Xalqaro darajaga chiqish va ommalashish — bu faqat bir klubning kuchi bilan amalga oshiriladigan ish emas. Bu Bundesliga sifatida hammamiz birgalikda ishlashimiz kerak bo‘lgan vazifa va liganing o‘zi bu borada ancha faolroq rol o‘ynashi lozim. «Bavariya» bu yukni yolg‘iz o‘zi ko‘tarishini kutish to‘g‘ri emas. Bizga butun Bundesliga tomonidan ancha jiddiyroq qo‘llab-quvvatlov kerak — faqat bir-ikkita klub emas, balki butun liga birgalikda harakat qilishi zarur», — dedi Xayner.
Ma’lumot uchun, ushbu yozda «Bavariya»dan tashqari faqatgina «Leypsig» (JAR) va Dortmundning «Borussiya» (Yaponiya) klublari xorijga turne uyushtirdi.
