Mashhur nemis sobiq futbolchisi Lotar Matteus "Bavariya"ning Bundesligada munosib raqiblari bor-yo‘qligi haqida fikr bildirdi.
Myunxenliklar Germaniya chempionatining so‘nggi ikki mavsumida ham chempionlikni qo‘lga kiritdi. O‘tgan mavsumda esa jamoa Germaniya kubogida ham g‘olib chiqqan.
"Agar favqulodda biror voqea yuz bermasa, Bundesligada hech bir jamoa "Bavariya"ning supertarkibi bilan chempionlik uchun kurashishga yetarli darajaga ega emas.
Hatto yanada ko‘prog‘ini aytaman: "Bavariya"ning ikkinchi tarkibi ham Dortmundning "Borussiya", "Shtutgart", "RB Leypsig" va "Bayer" bilan chempionlik uchun kurashish imkoniyatiga ega bo‘lardi. Mana shuning o‘zi "Bavariya" nega yana mutlaq favorit hisoblanayotganini juda yaxshi tushuntiradi", — dedi Matteus Sport Bild nashriga bergan intervyusida.
22 avgust kuni Vensan Kompani shogirdlari Germaniya Superkubogi doirasida Dortmundning "Borussiya" klubiga qarshi maydonga tushadi. 28 avgustda esa "Bavariya" Bundesliganing 2026/27 yilgi mavsumi 1-turida "Shtutgart" bilan uchrashadi.
