«Alaves» hujumchisi Mariano Dias yangi mavsumni juda muvaffaqiyatli boshladi.
33 yoshli futbolchi La Liganing 1-turida «Xetafe»ga qarshi uchrashuvda (3:0) bitta gol urdi va ikkita golli uzatmani amalga oshirib, jamoasining har uchala golida bevosita ishtirok etdi.
Ikkinchi turda esa «Alaves» safarda «Rayo Valyekano» bilan 1:1 hisobida durang o‘ynadi. Mariano ikkinchi bo‘limda zaxiradan maydonga tushib, jamoasini mag‘lubiyatdan qutqarib qolgan gol muallifi bo‘ldi.
Shu tariqa, «Real»ning sobiq hujumchisi La Liganing dastlabki ikki turida 2 ta gol va 2 ta golli uzatma qayd etib, jami 4 ta golli harakatni amalga oshirdi.
E’tiborlisi, Mariano har ikki uchrashuvda ham ikkinchi bo‘limda zaxiradan maydonga tushgan. U qisqa vaqt ichidayoq «Alaves»ning mavsum boshidagi eng samarali futbolchilaridan biriga aylandi.
Dias «Alaves» safiga o‘tgan yil yozida kelib qo‘shilgan.
