O‘zbek qilichbozligining zabardast vakili, Olimpiada sovrindori, jahon chempioni Sobir Ro‘ziyev 73 yoshida vafot etdi. Bu haqda Milliy olimpiya qo‘mitasi xabar berdi.
Sobir Ro‘ziyev Moskva-1980 yozgi Olimpiya o‘yinlarida kumush medal, jahon chempionatlarida 2 ta oltin, 1 tadan kumush va bronza medallari sohibi bo‘lgan.
Faoliyati davomida O‘zbekiston Respublikasi Davlat jismoniy tarbiya va sport qo‘mitasi raisi, Milliy olimpiya qo‘mitasi raisi, Qilichbozlik federasiyasi prezidenti lavozimlarida ishlagan. “O‘zbekiston Respublikasida xizmat ko‘rsatgan sportchi” faxriy unvoni bilan taqdirlangan.
