«Barselona» vingeri Rafinya Dias hujum markazida Xans-Diter Flikning asosiy tanlovi bo‘lib qolishi mumkin.

Braziliyalik futbolchi o‘zi uchun unchalik odatiy bo‘lmagan pozisiyada muvaffaqiyatli harakat qildi. U La Liganing ikki uchrashuvida markaziy hujumchi sifatida maydonga tushib, 3 ta gol urdi va 1 ta golli uzatmani amalga oshirdi.

Sport ma’lumotiga ko‘ra, agar «Barselona» madridning «Atletiko» klubi hujumchisi Xulian Alvaresni sotib ola olmasa, Rafinya kataloniyaliklarning asosiy markaziy hujumchisi bo‘lib qoladi. Klub boshqa forvard izlashni rejalashtirmayapti.

Manba ta’kidlashicha, Flik bu qarorni allaqachon qabul qilgan. Germaniyalik mutaxassis Rafinya bilan yangi pozisiyaga to‘liq moslashishi va jamoada sof «to‘qqizlik» yo‘qligini qoplashi uchun alohida ish olib bormoqda.